ໃນວັນທີ 17 ມີນາ, ລັດຖະບານອັງກິດໄດ້ປະກາດແຜນການທີ່ຈະລົງທຶນ 1 ຕື້ປອນ (1.39 ຕື້ໂດລາສະຫະລັດ) ເພື່ອຫຼຸດຜ່ອນການປ່ອຍອາຍພິດຄາບອນໃນອຸດສາຫະກຳ, ໂຮງຮຽນ ແລະ ໂຮງໝໍ ເຊິ່ງເປັນສ່ວນໜຶ່ງຂອງການກ້າວໄປສູ່ “ການປະຕິວັດສີຂຽວ”.
ລັດຖະບານອັງກິດວາງແຜນທີ່ຈະບັນລຸການປ່ອຍອາຍພິດສຸດທິເປັນສູນພາຍໃນປີ 2050 ແລະ ເພີ່ມການຈ້າງງານໃນເວລາດຽວກັນເພື່ອຊົດເຊີຍການສູນເສຍທາງເສດຖະກິດທີ່ເກີດຈາກການລະບາດຂອງພະຍາດປອດອັກເສບຊະນິດໃໝ່.
“ແຜນການດັ່ງກ່າວຈະຊ່ວຍຫຼຸດຜ່ອນການປ່ອຍອາຍພິດຄາບອນທີ່ເກີດຂຶ້ນໃນຂະບວນການພັດທະນາເສດຖະກິດໄດ້ຢ່າງຫຼວງຫຼາຍ, ແລະ ຊ່ວຍໃຫ້ສະຫະລາຊະອານາຈັກບັນລຸການປ່ອຍອາຍພິດຄາບອນໄດອອກໄຊດ໌ສຸດທິເປັນສູນພາຍໃນປີ 2050.” ທ່ານ ຄວາຊີ ຄວາເຕງ (Kwasi Kwarteng) ລັດຖະມົນຕີກະຊວງການຄ້າ ແລະ ພະລັງງານອັງກິດ ກ່າວໃນການປະກາດດັ່ງກ່າວ.
ການປະກາດສະແດງໃຫ້ເຫັນວ່າມາດຕະການເຫຼົ່ານີ້ຈະເພີ່ມວຽກເຮັດງານທຳໄດ້ເຖິງ 80,000 ຕຳແໜ່ງໃນ 30 ປີຂ້າງໜ້າ ແລະ ຊ່ວຍຫຼຸດຜ່ອນການປ່ອຍອາຍພິດຄາບອນໄດອອກໄຊດ໌ຈາກອຸດສາຫະກຳລົງສອງສ່ວນສາມໃນ 15 ປີຂ້າງໜ້າ.
ມີລາຍງານວ່າ ໃນຈຳນວນເງິນ 1 ຕື້ປອນທີ່ລົງທຶນໃນຄັ້ງນີ້, ປະມານ 932 ລ້ານປອນຈະຖືກນຳໃຊ້ເພື່ອສ້າງ 429 ໂຄງການໃນປະເທດອັງກິດ ເພື່ອຊ່ວຍສົ່ງເສີມການປ່ອຍອາຍພິດຄາບອນຂອງອາຄານສາທາລະນະ ເຊັ່ນ ໂຮງຮຽນ, ໂຮງໝໍ ແລະ ອາຄານລັດຖະສະພາ.